Dit un dat op platt

Korte Geschichten von Anna Birreck

Toveel Punnen.

Glieks no Wiehnachten geiht dat al los, denn stoht de Illustreertenvull dorvon: " So erreichen sie ihr Wunschgewicht  - schon in einer Woche eine Bikinifigur" un so wieter. Denn stoht dor 'n poor Sieten vull schreben, wat du för 'n Gröönfudder al eten mußt. Dorno büst den jümmer hungrig un  sochst heemlich in 'n Schapp no de letzte Wiehnachtsschokolaad. Nee, dormit heff ik nix an 'n Hoot. Wenn mien Büxen un Röck anfangt to kniepen, weet ik, dat ik dat drütte Stück Torte op 'n Geburtsdagskaffee lever nich mehr eten schull.

Annerletzt bi'n Dokter worr ik ok froogt, wieveel ik denn wegen de. Dat wüß ik nu jo nich. " Waaaas," wunnerwark de Dokter. Denn kreeg sien Spreekstünnenhelp mi op de Waag. De wies denn an, dat ik bloots fief Zentimeter to lütt weer för mien Gewicht. Dat is jo nu nich so, dat ik keen Waag heff in 'n Huus, allerdings nich so 'n moderne wie bi 'n Dokter mit "Körperanalyse" oder wie dat heet. Nee, mien Waag is al wat öller un russt al 'n beten an de Siet. Wo harr ik de överhaupt? Ach jo - ganz achtern ünnern Schapp in de Sloopkomer. Anerletzt bi 'n Fröhjohrsputz heff ik de eersmol vörtüüg kregen. Weer richtig Stoff op un ik müß de reinweg eerstmol putzen. Woneer harr ik de denn toletzt bruukt? Ach, ik wüß al, vör Wiehnachten harr ik unse Wiehnachtsgöös dorop wogen.

Mit de weer mien lüttje Kökenwaag överfordert. Ik kunn mi dor jo nu ok mol ropstellen. Oh - de Wieser worr jo bannig to spuddern. Denn keem he over to Roh. Na ja, wat de denn anwies, weer woll al mien Leevdag keen "Bikinifigur" . Wat schaallt, bi de Fröhjohrsarbeit will sik dat woll regeln, un ik heff een dannigen Bodeanzug, dor paßt allens rin.

Anna Birreck

Anna Birreck

Anna Birrek ist Mitglied im Plattdüütschen Schrieverkring twüschen Elv un Weser und im Heimatverein Frelsdorf. 

Sie schreibt plattdeutsche Geschichten, Kasperlestücke und Krippenspiel undist Mitautorin in 5 Büchern des plattdeutschen Schrieverkrings.